Prófaðu 30 daga frítt

Síðast uppfært : 21. júní 2022

Þessir skilmálar eru bindandi samningur milli notanda („Notandi”, „þú”) og TimeEd ehf., kt. 480312-0150, með lögheimili að Smáratorgi 3, 201 Kópavogi (”TimeEd” ,“þjónustan,”) og taka á notkun þinni á þjónustum TimeEd, meðal annars vefsíðum, hugbúnaði og öðrum vörum og þjónustum (sameiginlega kallað “Þjónustan”). Með því að nota þjónustu okkar samþykkir þú að vera bundin af þessum viðskiptaskilmálum, gagnavinnslu samningi og persónuverndarstefnu TimeEd.

Tímaskráningarkerfið TimeEd er öflug, yfirgripsmikil og umfram allt þægileg heildarlausn fyrir fyrirtæki sem vilja halda nákvæmlega utan um verkefnastjórnun, tímaskráningar og viðveru starfsfólks. Þetta vandaða kerfi heldur vel utan um öll verkefni og verkferli, bætir yfirsýn og gegnsæi fyrir starfsfólk jafnt sem stjórnendur og gerir rekstur fyrirtækisins mun skilvirkari.

Notendum TimeEd gefst kostur á fjórum leiðum til að nýta sér þjónustu fyrirtækisins.

Þjónustuleiðir eru eftirfarandi:

Frítt - 30 daga prufuáskrift, notandi fær án skuldbindingar prófa fulla útgáfu af TimeEd í 30 daga. Að því loknu hefur notandi val um að taka kerfið í notkun, skv. gjaldskrá eða gera ekki neitt og kerfið lokast og gögnin eyðast sjálfkrafa 30 dögum síðar.

Lite – Allt að 2 notendur, app og vefútgáfa, tenging við Þjóðskrá Íslands ásamt aðstoð gegnum vef- og símaþjónustu.

Pro - Allt að 20 notendur, app og vefútgáfa, tenging við bókhaldskerfi, senda reikninga beint frá TimeEd, tenging við Þjóðskrá Íslands ásamt aðstoð gegnum vef- og símaþjónustu.

Enterprise – viðbótargreiðsla skv. gjaldsskrá fyrir hvern auka notanda (umfram 25 notendur), app og vefútgáfa, tenging við bókhaldskerfi, senda reikninga beint frá TimeEd, tenging við Þjóðskrá Íslands, aðstoð gegnum vef- og símaþjónustu ásamt fleirum valkostum gegn aukagjaldi.

1. Skilagreiningar

Notandi: Aðili, hvort heldur sem eru lögaðilar eða einstaklingar, sem skrá sig inn á vef TimeEd með aðgangsupplýsingum og getur í framhaldi nýtt þá þjónustu sem í boði er á vefnum.

Þjónustan: Upplýsingar, verkfæri og virkni á vef TimeEd sem gera notendum m.a. kleift að halda nákvæmlega utan um verkefnastjórnun, tímaskráningar og viðveru starfsfólks.

2. Samþykki notkunarskilmála.

Með því að nota vefsíðuna www.timeed.is og app.timeed.is samþykkir þú sem notandi að fylgja þeim skilmálum sem hér koma fram. Skilmálar þessir eiga við um notkun á þessum vef og þeirri þjónustu sem er í boði, meðal annars vefsíðum, hugbúnaði og öðrum vörum og þjónustum (sameiginlega kallað “Þjónustan”). Öll notkun vefsins takmarkast við þær aðgerðir sem eðlilegar og löglegar geta talist, ásamt þeim upplýsingum og þjónustu sem boðið er upp á á hverjum tíma. Áður en þú lest áfram ættir þú að prenta út og vista eintak af skilmálum þessum.

3. Persónuvernd

Við skráningu er gerð krafa um að ákveðnar persónuupplýsingar notenda séu gefnar upp, s.s. nafn, kennitala, heimilisfang og netfang.

TimeEd starfar að öllu leyti í samræmi við íslensk lög um persónuvernd og vinnslu persónuupplýsinga nr. 90/2018.

TimeEd skráir hvorki né geymir persónuupplýsingar um notanda umfram það sem nauðsynlegt er til að veita honum umbeðna þjónustu og ekki án þess að hafa fengið skriflegt og skýrt samþykki hans. Þegar ekki er lengur þörf á að geyma umræddar upplýsingar er þeim eytt.

Prufuútgáfan: Eftir 30 daga prufuáskrift er lokið þá eyðast öll gögn hjá notanda 30 dögum síðar.

Virk útgáfa (greidd): Eftir 90 daga frá því kerfi lokast þá eyðast öll gögn hjá því teymi/notanda

TimeEd hefur sig í frammi um að vernda persónuupplýsingar og gerir nauðsynlegar ráðstafanir til þess, þar með talin persónuauðkenni, í samræmi við íslenska löggjöf.

TimeEd ábyrgist þó ekki tjón vegna persónuupplýsinga sem aðrir kunna að komast yfir með ólögmætum hætti.

TimeEd getur ekki ábyrgst að persónuupplýsingar komist ekki í hendur þeirra sem hafa með ólögmætum hætti komist yfir leynilegar aðgangsupplýsingar frá notanda sjálfum eða tölvubúnaði hans

4. Aðgangur að þjónustunni og aðgangsupplýsingar notenda

Notendur eru ábyrgir fyrir því að tryggja leynd lykilorða sinna sem gerir þeim mögulegt, ásamt notandanafni þeirra, að innskrá sig á TimeEd. Með því að láta TimeEd í té netfang sitt samþykkja notendur að TimeEd megi, þegar nauðsyn krefur, senda notendum tilkynningar á netfang þeirra í tengslum við aðgang þeirra að þjónustunni.

Notandanafn, lykilorð og aðrar samskiptaupplýsingar sem notendur kunna að láta TimeEd í té teljast til „aðgangsupplýsinga“ notenda. Réttur notenda til að fá aðgang að og nota þjónustuna er bundinn við þá og þeim er ekki heimilt að flytja þann rétt til annars einstaklings eða lögaðila. Notendum er einungis heimilt að fá aðgang að og nota þjónustuna í löglegum tilgangi.

Aðgangur notenda að TimeEd gæti rofnað af ýmsum ástæðum, t.d vélbúnaðarbilun, tæknilegum bilunum, hugbúnaðarvillum eða uppfærslu á kerfi. TimeEd ber ekki ábyrgð á tjóni sem slíkt kann að valda, sbr. 9. gr.

5. Þóknun TimeEd

Þóknun TimeEd er í samræmi við gildandi verðskrá hverju sinni og ábyrgist TimeEd að rétt gjaldskrá er alltaf aðgengileg á vefnum. Fyrsta hvers mánaðar sendir TimeEd út reikninga fyrir notkun núverandi mánuð, sem dæmi eru reikningar sendir út 1. júní fyrir notkun í júní mánuði. Krafa TimeEd fellur á eindaga sjö dögum eftir útgáfu hennar.

6. Tilkynningar til notenda með tölvupósti

Það geta komið upp tilvik þar sem TimeEd sendir notendum sínum nauðsynlegar tilkynningar með rafrænum hætti. Tilkynningarnar tengjast þá skráningum og aðgangi notenda, sem dæmi um þetta er þegar aðgangsupplýsingum er breytt eða aðrar valkvæðar tilkynningar í tengslum við notkun á þjónustunni. Af og til kann TimeEd að bæta við nýjum tegundum tilkynninga eða að fjarlægja tilteknar tegundir tilkynninga. Rafrænar tilkynningar frá TimeEd verða sendar á netfangið sem notandi gaf upp í tengslum við aðgang notanda á TimeEd

Þar sem tilkynningar eru ekki dulkóðaðar munu þær aldrei innihalda lykilorð notanda nema í upphaf þegar notandi er nýskráður, svo mælt er með að notandi breytir lykilorðinu sjálfur eftir fyrstu innskráningu. Í þeim tilfellum sem notandi gleymir lykilorði sínu getur hann fengið sendan hlekk á uppgefið netfang á slóð sem gerir viðkomandi kleift að búa til nýtt lykilorð.

Tilkynningar geta innihaldið netfang notanda (þegar sendur er tölvupóstur). Allir sem hafa aðgang að tölvupósti notanda munu geta séð innihald tilkynninganna.

Notandi er meðvitaður um að öllum tilkynningum sem sendar eru með notkun þjónustunnar gæti seinkað eða þær ekki borist notanda af ýmsum ástæðum. TimeEd reynir eftir fremsta megni að tryggja að tilkynningar berist fljótt og örugglega en ábyrgist á engan hátt að tilkynningar berist eða að tilkynningar innihaldi ávallt nýjustu og/eða réttar upplýsingar. Notandi samþykkir að TimeEd ber enga skaðabótaskyldu vegna tilkynninga sem berast seint eða ekki, vegna villna í efni tilkynninga eða vegna ákvarðana sem notandi eða þriðji aðili tekur eða tekur ekki vegna tilkynninga sem sendar eru frá TimeEd.

7. Hugverkaréttindi

Allt innihald vefsvæðis tímaskráningarkerfisins TimeEd, þar með talið útlitshönnun (t.d. texti, grafík, myndir, vörumerki), ljósmyndir, hugbúnaður, ritstýrt efni, tilkynningar og annað efni er varið samkvæmt höfundarréttar- og vörumerkjalögum á Íslandi og annars staðar. Innihald vefsvæðis tímaskráningarkerfisins TimeEd er eign TimeEd ehf eða notað samkvæmt leyfi frá hugbúnaðar-, gagna- eða öðrum efnisveitum sem TimeEd á í viðskiptasambandi við. TimeEd veitir notendum leyfi til að skoða og nota vefsvæði TimeEd samkvæmt þessum skilmálum. Notendur mega eingöngu sækja eða prenta afrit af upplýsingum og efni á vefsvæði tímaskráningarkerfisins TimeEd til sinna eigin persónulegu nota sem ekki eru í fjárhagslegum tilgangi í samræmi við II. kafla höfundalaga. Öll dreifing, endurútgáfa eða rafræn afritun af innihaldi vefsvæðis tímaskráningarkerfisins TimeEd, hvort heldur sem er að hluta til eða heild, eða í einhverjum öðrum tilgangi er þér með öllu óheimil nema með skriflegu samþykki TimeEd.

Um brot gegn þessari grein fer skv. ákvæðum 13. gr.

8. Aðgangstakmarkanir

Þegar notandi samþykkir skilmála þessa fellst hann á að hann muni ekki nota nokkurs konar sjálfvirkan hugbúnað, forrit eða aðrar aðferðir til að verða sér út um aðgang að, afrita eða fylgjast með einhverjum hluta af vefsvæði TimeEd nema með skriflegu leyfi TimeEd og/eða ef slík þjónusta hafi verið keypt af TimeEd.

Notandi samþykkir einnig að hann muni ekki nota forrit, hugbúnað eða annars konar aðferðir til að heimsækja, nota eða leita að gögnum á vefsvæði TimeEd nema með almennum vöfrum (t.d. Firefox eða Google Chrome) og almennum leitarvélum (t.d. Google eða Bing).

Notandi samþykkir að hann muni ekki senda skrár eða gögn á vefsvæði TimeEd sem geti flokkast sem tölvuvírus, tölvuormur eða trójuhestur eða skrár sem innihalda einhvers konar skaðlega eiginleika og/eða geta á einhvern hátt truflað eðlilega virkni og/eða þjónustu TimeEd.

Notandi samþykkir að hann muni ekki reyna á nokkurn hátt að sækja, birta eða greina undirliggjandi forritskóða út frá þeim hugbúnaði sem er notaður af TimeEd. Ef notandi fær aðgang að undirliggjandi forritunarkóða á vegum TimeEd, s.s. vegna bilunar, ber honum að tilkynna slíkt til vefstjóra (hjalp@timeed.is)

Um brot gegn þessari grein fer skv. ákvæðum 13. gr.

9. Takmörkun ábyrgðar

TimeEd ber ekki ábyrgð á óþægindum eða tjóni sem orsakast beint eða óbeint vegna bilunar í tölvubúnaði og/eða hugbúnaði fyrirtækisins eða notanda eða af öðrum orsökum, sem kunna að valda því að upplýsingar eru ekki réttar eða að notandi nái ekki að tengjast þjónustunni. TimeEd ber ekki ábyrgð á óþægindum eða tjóni sem kann að orsakast beint eða óbeint vegna galla eða bilunar í endabúnaði, tengingu við veraldarvefinn, þeim hugbúnaði sem nauðsynlegur er til tengingar við vefsvæði TimeEd, vafra eða stýrikerfi notanda eða tölvukerfi TimeEd, eða af öðrum þeim orsökum sem kunna að valda því að aðgerðir á vefsvæði TimeEd geta ekki farið fram eða verða með öðrum hætti en til var ætlast s.s. vegna tæknibilana, villna í gögnum eða truflana í rekstri tölvukerfa. TimeEd ber ekki ábyrgð á tjóni sem hlýst af vanþekkingu, misskilningi eða misnotkun notanda eða annars aðila með eða án umboðs notanda. TimeEd ber ekki ábyrgð á tjóni sem rekja má til rangra aðgerða notanda eða annars aðila. TimeEd ber ekki ábyrgð á tjóni sem rekja má til utanaðkomandi atvika t.d. bilana, rangra utanaðkomandi upplýsinga o.þ.h. Enn fremur ef rekja má tjónið til atvika sem stafa af náttúruhamförum, styrjöldum, verkföllum eða vegna atriða sem talin verða falla undir óviðráðanleg tilvik (force majeure).

10. Lokun aðgangs, gildistími skilmála og breytingar á skilmálum

TimeEd áskilur sér rétt til þess að grípa til hvaða aðgerða sem teljast nauðsynlegar til að bregðast við brotum gegn skilmálum þessum, þ.m.t. tafarlausrar lokunar á aðgangi notanda.

TimeEd áskilur sér rétt til þess að loka einhliða aðgangi notanda (eftir atvikum að eyða aðgangi) að vefsvæði TimeEd hvenær sem er, og án fyrirvara. Þegar TimeEd metur að grípa þurfi til slíkra aðgerða verður notanda gert viðvart um þá ákvörðun og send tilkynning þess efnis á netfangið sem notandi gaf upp við skráningu. Sem dæmi um slík tilfelli er t.d. ef notandi verður uppvís að misnotkun á kerfi TimeEd, ef notandi hefur brotið í bága við eitthvert ákvæði þessara skilmála, eða ef notandi hefur hegðað sér á þann hátt að augljóst er að notandi ætli ekki eða geti ekki uppfyllt ákvæði þessa skilmála. Ef grunur vaknar að um lögbrot sé að ræða þá áskilur TimeEd sér rétti til tilkynna slíkt til yfirvalda.

TimeEd sendir út reikninga til viðskiptavina sinna 1. hvers mánaðar vegna notkunar fyrir mánuðinn þar á undan, sbr. 5. gr. skilmála þessa. Krafan fellur á eindaga sjö dögum eftir útgáfu hennar og sé krafan ekki greidd innan 20 daga eftir eindaga er aðgangi notanda lokað þar til greiðsla berst.

11. Gildistími skilmála og breytingar á skilmálum

TimeEd áskilur sér rétt til að að breyta þessum viðskiptaskilmálum og bæta við þá hvenær sem er og taka slíkar breytingar gildi án fyrirvara. Ef um er að ræða breytingar sem eru ekki til hagsbóta fyrir notendur þjónustunnar skal tilkynna notendum um þær með tryggum hætti með minnst sjö daga fyrirvara fyrir gildistöku breytinganna.

12. Ágreiningur milli aðila og lögsaga

Um skilmála þessa gilda íslensk lög. Ef eitthvert ákvæði skilmála þessara verður dæmt ógilt, ólöglegt eða óhæft til fullnustu, dregur það ekki á neinn hátt úr gildi, lögmæti eða fullnustuhæfi annarra ákvæða skilmálanna. Notendur samþykkja að jafnvel þó svo að TimeEd nýti sér ekki einhvern þau réttindi sín sem hljótast af þessum skilmálum að þá skuli ekki túlka það sem afsal þess réttar. Rísi mál út af skilmálum þessum skal það rekið fyrir Héraðsdómi Reykjavíkur.